عن #SherioRecommends

بدات الفكرة بشكل عفوي يومين قبل الانتخابات، يوم 26 نوفمبر و كنت قد استقريت على مرشح العمال في دائرتي لتوه بعد حديث مع الحاج حسن سينيوريتا احد الرجال القدامى بشارع المنيل، و كنت لا زلت اختار ما بين الكتلة المصرية و قائمة الثورة مستمرة...في نفس الوقت كان على تويتر ناس كتير مش عارفة هتختار مين بالذات مقعد العمال، احد مخلفات العهد الناصري، فكرت اني لو كنت في مصر الجديدة كنت هنتخب عمرو حمزاوي و لو مدينة نصر كنت هنتخب النجار و كتبت كده و كتبت معاها #SherioRecommends بالمرة كدة....بصيت لاقيت سيل من الاسئلة عن العمال و الدوائر المختلفة فاكتشفت ان فاضل يوم و نص على الانتخابات و ناس كتير معندهاش فكرة هتنتخب مين فقررت اعمل قائمة باللي اقدر علية و ادور انا ممكن تفيد حد...و كانت 


لينك لتوصيات محافظة القاهرة 

انا اخترت ازاي.


البداية: انا عرفت انا اتجاهي السياسي ايه، انا طول عمري عارف ان انا وسطي (مش الحزب) فانا فيا حتة ليبرالية على نشأة محافظة و مقتنع بالرأس مالية و العدالة الاجتماعية من غيرها المجتمع لا يصلح. ربما المجتمع حاليا بيتشد لليمين الديني فمكاني مع انه وسطي في المطلق الا انه بيبدو ليبرالي نسبيا جنب الوضع الحالي في مصر.
جدير بالذكر اني ليا مقولة بكررها هي "لولا الاسلاميين لكنت اسلامي" لكن ده موضوع تاني لوقت تاني.


ثانيا: فكرت انا عايز المجلس عامل ازاي، قلت ده مجلس لازم يعكس المجتمع زي ما هو قبل الحملات الانتخابية و الاستقطاب و الاقصاء، مصر على سجيتها...يعني لازم تكون وسطية في المطلق فيها نسبة ليبراليه و بُعد يساري و اخوان و بعض السلفيين كمان. 


ثالثا: شفت الواقع بعد الثورة و الحركات السياسية و الاستقطاب و الاقصاء عامل ازاي، و لقيت التيارات الاسلامية ليها الغلبة، و انا اختلف معاها ايديولوجيا و مع المتطرف منها اعتبره خصم سياسي.


و انا اريد مصر مدنية ديمقراطية تعددية عظيمة الشأن داخليا و خارجيا.


بعد التلات نقط اللي ذكرتها ابتديت مرحلة التدوير و كنت بعتمد على التيارات القوية و الاسماء المعروفة و خصوصا في الفردي عشان الصوت للي ملوش فرصة في المكسب هو صوت مهدور. 


ذاكرت الدوائر و قسمتهم و ابتديت بالقوائم، مبسطش للقوائم الدينية لاسباب مذكورة سابقا و ركزت مع القوائم المدنية...كان قدامي الثورة مستمرة و هي زي اسمها كده بتحافظ على مكتسبات الثورة و لديها برنامج محترم و ينقصها الخبرة السياسية في التطبيق. الكتلة المصرية و هي التيار الاكثر ليبرالية و براجمتية في كل القوائم و مُطعم بنكهه يسارية و لكنه يحمل بعض الفلول. حزب العدل بمكتبة السياسي الجيد المُطعم ببعض رموز(مستخدمها كده يعني) الثورة. حزب الوسط و هو الحزب المحافظ بالمعنى السياسي للكلمة ذو الشخصيات المحترمة في قياداته.


الفصل في القوائم بالنسبه لي كان بيبقى بقوة القائمة، التيار اللي انا مقتنع بيه ابص لقائمته و اشوف اول 2-3 فيه و الشخوص الافضل اروح لقائمتهم. و انتهى بي الحال باتنين ثورة مستمرة (لاقتناعي بيها) و اتنين كتلة مصرية لقوة قوائمهم.


الفردي كان سهل في الفئات في بعض الدوائر. سياسيين معروفين ذوي سمعة كويسة مصر محتاجاهم في البرلمان زي النجار و حمزاوي، و اخرين سؤال اصحابي من النشطاء السياسيين او المنتمين لاحزاب و سيرهم على النت رجحت كفتهم زي حافظ ابو سعدة و ماجي محروس و جون ابادير. اللي فضل في القوائم حسم عن طريق مقارنة ترشيحات التيارات الختلفة باراء اصدقائي من النشطاء.


في العمال كنت بسأل مرشحي الفئات يرشحوا حد و غير كده السؤال في الشارع كان بينفع، النت لغاية دلوقت كان برضه ابن حلال.


انا معترف اني رضيت ببعض الفلول لكن بعد التأكد من انهم مكنوش من المزورين (بشكل شخصي) و ده في مقاعد العمال، ده لأن الوطني كان بيضم اي حد عنده شعبية و كان ارتضاء الانضمام عادة ليسهيل الحصول على خدمات لاهل المنطقة، زي الصعيد مثلا.


نقاط اخيرة:

• اعترف ان في المرحلة الاولى حزب الوسط سقط مني في حساباتي سهوا.
• لو كان العدل و الوسط اتحدوا كانوا عملوا احسن القوائم.
• هحاول في المرحلة التانية ابقى احط اسباب الاختيار و اطرح بدائل و اتجنب الفلول.
• اي تيار اسلامي بيقول حاجة غير انة يسعى للسلطة هو تيار منافق و اقروا تاريخ الدولة الاسلامية اللي كان كله فرق و مذاهب تتناحر على السلطة و بتكفر بعضها البعض باسم الدين.
• ولا الليبرالية ولا العلمانية حرام، دي مذاهب سياسية ملهاش دعوة بالقياس الايماني. ممكن صاحبها يبقى متدين او كافر و ده ملوش دعوة بيها كمذهب.

و ارجو ان المرحلة التانية اعرف اعمل توصيات على التسع محافظات.

ثرثرة ذاتية في يوم عاصف

السطور التالية نقشتها و انا في طريقي الى المنزل من العمل، كنت قد اخذت المترو الذي يوصلني الى الضفة المقابله لبيتي من النهر و اتت الفكره و انا اعبر كبري الملك الصالح خالد الذكر، و كانت خيم الاعاشة تحترق في الميدان الهواء يهب من مكاني الي هناك.

جو رائع بنسيم عليل

سما صافية و نيل بيجري بخفة و دلع

كلب محني ماشي ذليل

جو رائع بنسيم عليل

بيهب من عندنا لمهد التحرير

الورد اتقلع و الجناين اتحرقت

و النسيم بيهب من عندنا للمهد

معرفش فينا غير كلب...ماشي محني و ذليل

سما صافية و نيل بيجري بخفة و دلع

و الصبي قاعد بيغازل في الصبايا...حقه

هو مين يشوف الخفة و ميتغزلش في الدلع

الناس تعدي و تسير

و الكلب محني حزين

مهو هو الوحيد اللي حس و سمع

شم حريق الحرية انكسر

ولما انكشفت غمامته وعرف الحقيقة ارتاح مرة

و اتقتل من جواه الف مرة و مرة

حقيقة ان كل الناس مش ناس

انسدل عليهم الذل لباس

كلهم كما الكلاب...كما هو...ماشيين محنيين و ذلولين

بس لو تنكشف الغمامة دية

و يشموا حريق مهد تحرير الحرية

يقوموا يهبوا كما الاسود في غابة قوية

ينتزعوا حرمة مهد الحرية

ويرتاحوا كبني ادمين شامخه و ابية

الديمقراطية مش بس حرام......دي كُفر كمان

مش عارف لية بقيت دائم الانتقاد للاسلاميين/المتأسلمين مع اني اؤمن بان لو الواحد ركز مع حد او جهة و قعد ينتقد في العيوب هينسى نفسة و سُبُل تقدمه، و لكن في حالة الاسلاميين الموضوع مختلف لان ديني الجميل السَمِح بلاقية بيتشوة على طول على ايد ناس (في رأيي) قاعدين في الضلمة....دة البعض مش الكل طبعا بطلوا تربُص.

عبد المنعم الشحات و هو المُتحدث الاعلامي باسم الحركة السلفية و اللي كان معروض علية انة يمسك المكتب السياسي لحزب النور خرج علينا من شهر تقريباً (معلش الفيديو لسة واصلي من شوية) بيقول ان اليمقراطية مش بس حرام...لا دي كمان كُفر...هو هيتصرف و يلعب ديمقراطية من غير ما يكفر متقلقوش علية. و طبعا هو رجل صاحب علم و له مريديه و جمهوره ولو عايز يكفَر يكفُر براحته (من قال لأخيه يا كافر فقد باء بها أحدهما) و الي ساعتها برده هيبقى براحته يعني (فَمَنْ شاءَ فَلْـيُؤْمِنْ وَمَنْ شاءَ فَلْـيَكْفُرْ).


لما شفت الفيديو فكرت بسرعة كدة و لقيت الكلام مش راكب (كتير هيقولولي متفكرش في الدين، لو سمحت اقرأوا التدونة دي بسرعة كدة) فقررت ارد بالافكار اللي عدت عليا.


انا من الاصل مش شايف اختلاط بين الدين و السياسة عامة و الديمقراطية خاصة اكتر من الاطار العام الاخلاقي و العقائدي اللي بنتحرك بداخلة لكن مش مهم، المهم انك لما تقرأ في التاريخ شوية هتلاقي ان العرب و المسلمين في اوائل دولتهم (الخلفاء لغاية العصر العباسي الاول كدة) كان عندهم قدر كبير من حرية التعبير اللي هي اساس الديمقراطية، و ده بالمقارنة بالامم المجاورة ليهم زي الفرس مثلا؛ يعني الخليفة مكنش اعلى من الناس كتير و كان دائما ما يتناقش مع جالسية بحرية. حتى ايام الرسول تلاقي ان كان في حتى مغالاة في الديمقراطية و التعبير عن الرأي كان بحرية شديدة لدرجة نزول آية بتحد من الديمقراطية دي (لا تَرْفَعُوا أَصْوَاتَكُمْ فَوْقَ صَوْتِ النَّبِيِّ)اللي منها نستدل انه كان في حوار منفتح مع خير البرية الرسول (ص).
بلاش دي...حد عارف اسباب نزول آية (يَا أَيُّهَا الَّذِينَ آمَنُوا لا تَدْخُلُوا بُيُوتَ النَّبِيِّ إِلاَّ أَن يُؤْذَنَ لَكُمْ)؟
اقلكم انا. كان في واحد سيد قومة اسمه عُيَينة بن حصن دخل على النبى (ص) و عنده عائشة بدون استئذان، فقال رسول الله: أين الااستئذان؟ قال يا رسول الله ما استأذنت على رجل قط ممن مضى منذ ادركت، ثم قال: من تلك الجميلة الى جانبك؟ فقال (ص) : هذه عائشة أم المؤمنين. فلما خرج سألت عائشة: من هذا يا رسول الله؟ قال احمق مطاع، و إنه على ما ترين لسيد قومه. و نزلت الآية و زي ما هو واضح ان سقف الحرية الكلامية كان عال بعيداعن قلة الذوق.
طب حد يعرف سبب نزول آية ( إِنَّ الَّذِينَ يُنَادُونَكَ مِنْ وَرَاءِ الْحُجُرَاتِ أَكْثَرُهُمْ لا يَعْقِلُونَ)؟ مش هقلكوا، دوروا عليها انتو بقة (آه انا غلس و عايزكو تتعبوا و تدوروا، مش انتو على النت اصلا؟ اتعبوا عشان المعلومة).


انا عارف الامثلة دي مش بتعبر عن الديمقراطية بلآليات الحالية بس النقاش الحر واضح في المعاني و دي اساس الديمقراطية الحديثة.


على فكرة بعيدا عن موضوعنا يا ريت حد من بتوع دراسة السياسة يخرجلنا نظام احدث شوية من الديمقراطية عشان قدم و مشاكله كترت.


بمناسبة الحديث في الدين انا منتظر اللي هيكفروني و اللي هيتهموني بالهرطقة (ايوة الهرطقة انا مثقف جدا اصلا).

Incidental quartet

I shouted out to the valley

a shout loud and clear

echoing from here to the skies

but there's no one there to hear

هو الجيش عايز اية؟

من مميزات انك يبقى عندك مدونة هو اللا حدود اللي تقدر تكتب بية. لو عايز تعيد تعرف نفسك كل مرة بشخصية مختلفة مش مشكلة، عامية فصحى او انجليزي مخلط لاوندي مش مهم، المهم تكتب.
انا النهاردة هرتدى عباءة المحلل الاستراتيجي اللي شاف و فهم كل حاجة في حياتة دة و الله المستعان.




الجيش في عصور ما قبل الثورة كان بيشار اليه في اوقات كثيرة انه (دولة داخل الدولة) بمعنى ان لكل وزارة او جهاز مدني بيحكم في جهاز موازي ليه في الجيش و بيتصرف بحرية تامة، يعني في في جهاز بدل وزارة الاعلام، في مخابرات، في شرطة، قضاء و نيابة، امداد و تموين لزوم التجارة و في مزارع و مراعي. دولة بايدولوجيتها موجودة و بتحكم من وراء الدولة، القشرة الخارجية.


 بس كان في تنسيق و ترتيب ما بين الاتنين فكل ما يتعلق بالامن القومي (مش الجهاز) و العلاقات مع اسرائيل او امريكا و كمان كل ما يتعلق بسيناء-من الواضح-بيعدي على الجيش الاول، باقي الشئون كانت موكلة للحكومة المدنية، و الحكومة دي كانت بتلعب سياسة بحنكة و مهارة مع الجيش عشان كدة حافظ عليها لاخر رمق.


و للسبب ده لما قامت الثورة و امرت ايديولوجية الجيش انه يتدخل و يتولى الحكم مكنش في مشاكل، كل جهاز قام مقام الجهاز الكمافىء ليه.


الايديولوجية دي بقة نابعة من عقيدة الجيش اللي اتكونت في عهد عبد الناصر و اتشكلت في عهد السادات و اثرت عليها عوامل التعرية في عهد مبارك.


الجيش في اول و اخر الامر مهتم بامن و امان مصر، يعني لما اتدخل وقت الثورة كان لاستعادة الاستقرار في المقام الاول. بس ده مكنش كل حاجة.


الجيش دولة جوه الدولة و دولة ليها خطوطها الحمرا و وضعها القوي اللي مش هتسمح بزعزعتة حتى لو الدولة (القشرة الخارجية) سقطت، و تاثير عوامل التعرية بتاعت عهد مبارك لسة موجودة في هيئة فساد، حتى لو كان اقل من الموجود في القشرة الخارجية بس فتح ملفاته هيسبب بلبلة هم في غنى عنها.


من هنا احب اوضح حقيقة واضحة لوحدها للاخوة الثورجية. الجيش هو القوة المسيطرة في البلد، مسيطر على الاعلام و الشعب المصري بجموعة مصدقة و واخدة فرعون الجديد، و كمان من الناحية السياسية (العلمية كدة) عندة كل مقومان الحكومة المهيمنة المسيطرة من اول تقديم الخدمات المختلفة لاحتكار حق استخدام القوة للتمثيل الدبلوماسي امام العالم و شرعية اتخاذ القرارات المنظمة. من الاخر ملوش عندنا غير كلمتة.


فعلى كل دة لازم الرئيس القادم يكون ظريف، بيعرف يلعب سياسة مع الجيش و مش هيضايقهم، عمرو موسى مثلاو لانة بحكم سنة و تخرجة من المدرسة السياسية الكلاسيكية اللي ياما لعبت مع الجيش هينفعهم، و لو كان شخصية تحتمل الراديكالية في القرارات كان عمل حاجة ايام الجامعة العربية، اليف ميتخفش منة.


و على كدة برضة الاسلاميين مش هيطلعوا بكتير لان الالة الاعلامية العسكرية لا زالت اكثر سيطرة على الجموع، و لان الاخوان برضة فاهمين اصول لعب السياسة مع الجيش. و كلة من غير تزوير، هو شوية ضغط و تلاعب خفيف كدة و هيطلع النتيجة على مزاجة.


انا مش بدعو للاحباط ولا انا من دعاة ان الثورة مغيرتش حاجة، انا بس بوضح النقاط اللي متغيرتش، و الاهم عايز اوضح ان المجلس بيلعب على استراتجيات و تكتيكات بعيدة المدة عشان يوصل لاهداف محددة انما الثوار ما شاء الله عمري ما شفتلهم هدف واحد، كلها مطالب مطالب و بص تحت الرجلين، لقد هرمنا و مع ذلك لسة بندور على مطالب، يعني مطلب المحاكمات العسكرية ده عظيم، بس الهدف هو العدل فلازم نركز اكثر مجهودنا على الاهداف و نستمر في الضغط بس بحنكة اكثر مش بعند و صوت عالي.


ركزوا على الاهداف نصرة للثورة يرحمكم و يرحمني الله.

لم تكتمل

كنت اقلب في اوراقي القديمة و عثرت على بضع كلمات منظمة تنظيما عفويا, و قررت نشرها هنا كما هي و بدون تعديل او تكملة.

انا العارف بلوع الليل

متصنع البسمة معتاد الويل

ذهبت وحشتي و اتت الابتسامة

عفوية، دائمة و اشرقت الهامه

هذا نتاج التجول بقلم و ورقه، تستطيع ان تسيطر على الخواطر وقت وحيها، و لكن يعيبها عدم الاكتمال و عدم الانتهاء في بعض الاحيان.

ربما اقرر الانتهاء مما بدات، ولكن في الوقت الحالي هي ناقصة.

Don't bother

She was a beauty with eyes of art

Leaving me with a beautiful hole in my heart

Leaving me on a night as dark as regret 

Where I was left to fight my own melancholical threat 

So I wore my brave helmet, valiantly fought for peace

Swept to victory only for my sorrow to increase 

But this warrior holstered his sword

And rested to contemplate the happiness he was once told

And with a prayer to that lovely sod

He asked not for an end to what had no start from god

2011

ارتشفت خمر الحب تقطيرا

و احتضنت سموم العدو تحريرا

و جادلت مختلف الفكر تنويرا

و تقدمت و سقطت فقمت تكريرا

و تهت فلذت لك ربي ما لي غيرك نصيرا

قصة الخوارج

أكبر مأساه التاريخ بيحكيها هي أنه دايماً بيعيد نفسه و محدش بيتعظ.

 فتلاقي دايماً كل الأحداث بتتكرر مع اختلاف الأسماء، نفس الدوافع بنفس الطرق تلوينها و محاولات اخفاها، نفس طرق الحشد، نفس الدورات و توالي الأحداث ألي بتبدو غير متصله برغم أنها ديما بتيجي ورى بعض.

أسمحولي احكلكوا حكايه من التاريخ، التاريخ الأسلامي.

حكايه عن فرقه في أول تكوينها كنت سياسيه بحته و كانت في تدينها شديده و لكنها اندثرت زيها زي غيرها من الحركات و ليها اللي ليها و عليها اللي عليها. 

لما كانت وقعة صفين بين علي بن أبي طلب و معاويه، و طلب معاويه تحكيم كتاب الله، اختلف أصحاب علي ما بين القبول لتحكيم و رفضه و لكن بعد جدل قبل علي بالتحكيم و ساعتها خرج بعض من  أصحاب الأمام علي عليه و رأو أن التحكيم ده خطأ لان حكم الله (من وجهة نظرهم) واضح و مش محتاج تحكيم فليه يرضوا بتحكيم و هو بيتضمن شك كل فرقه في موقفها. و هنا خرجوا بمقولة ((لا حكم إلا لله)) و ألي رد عليها سيدنا علي و قال أنها ((كلمة حق يراد بها باطل)).


من هنا نشئت الحركه و هي بكده في المقام الأول فرقه سياسيه، المهم الطائفه دي طلبت من علي أنه يقر على نفسه بالخطأ و في بعض الأوقات بالكفر. 


و هنا اتسموا ((الخوارج)) لأنهم خرجوا على علي و صحبته. و حاربهم علي في موقعة القيروان و أنتصر عليهم و قتل منهم الكثير و لكنه لم يقض تماما عليهم  و زادوا في كرهه حتى دبروا له مكيده لقتله و نجحوا.


و فضلوا الخوارج شوكه في ظهر الدوله الأمويه يهددوها و يحاربوها حرب متواصله في شده و شجاعه نادره و لم يتغلب عليم الأموين إلا بعد حروب طويله و بقى منهم القليل في العصر العباسي لكن كانوا ضعاف الشأن و اندثروا.


و الخوارج مكنوش فرقه وحده و انما انقسموا عشرين فرقه تقريباً، اختلفوا أحيانا في أصول الحركه الخوارجيه. و أصول الحركه كانوا نقتطين اساسيتين الأوله نظريه في الخلافه مش هنتعرضلها و نظريه أن العمل جزء من الأيمان و ده الأهم لينا. فالخوارج اقروا أن العمل بأوامر الدين - من صلاه و صوم و صدق و عدل - جزء من الأيمان، و ليس الايمان و الأعتقاد وحدهما، و عليه فمن أعتقد بلا إله إلا الله و أن محمد رسول الله و معملش بفروض الدين و ارتكب الكبائر فهو كافر.


و الي ينظر في تاريخهم هيلاقي ميزات واضحه زي التشدد في العباده و  الانهماك فيها و كانوا بيتبرأو من الكداب و من صاحب المعصيه الظاهره.
و في نفس الوقت اشتدوا في معاملة مخالفيهم من المسلمين، حتى كانوا مبيرحموش ولا المرأه ولا الطفل ولا الشيخ، ولا حتى اللي مجرد اختلف معاهم في أن علي أخطأ في التحكيم و لم يقر بكفر علي و اللي أتنصروله. فمثلا طلبوا من عبد الله بن الزبير أنه يتبرأ من أبوه (و الزبير أبن العوام من العشرة المبشرين بالجنه).


كانت طائفه لها ما لها و عليها ما عليها و لكنها اندثرت و اختفت زي غيرها من الفرق و اختم قصتهم بقول عمر أبن عبد العزيز لبعضهم مره ((اني قد علمت انكم لم تخرجوا مخرجكم هذا لطلب دنيا او متاع، و لكنكم اردتم الاخره فأخطأتم سبيلها)).

انتهى

قصه سيئة السرد أنا عارف لكن العبر و الاسقاطات المقصوده موجوده بكثره. 

فربنا قال (( وَكَذَلِكَ جَعَلْنَاكُمْ أُمَّةً وَسَطاً)) فالفضيله وسط بين رذيلتين، الأفراط و التفريط، و وجدنا هنا الأفراط واضح و الرسول لم يخير بين أمرين إلا و اختار أيسرهما ما لم يكن اثما و كمان الرسول قال ((هلك المتنطعون)) و قالها ثلاث مرات و المتنطعون: المتشددون، المغالون، المتعمقون في أمر الدين.

و شريعة الاسلام ضيقت دائرة المحرمات، و الأصل في الاشياء هو الأباحه، فكل شيء مباح في الأسلام إلا ما حرم بنص.

نهاية: هي قصه و كل واحد يستنبط منها الموعظه على مزاجه. 

و اختم التدوينه خير ختام بما قال تعالى في نهايه السوره ألي ابتدأها ((نحْن نَقُصُّ عَلَيْكَ أَحْسَنَ الْقَصَصِ)) سورة يوسف باية 

((لَقَدْ كَانَ فِي قَصَصِهِمْ عِبْرَةٌ لِأُوْلِي الأَلْبَابِ مَا كَانَ حَدِيثًا يُفْتَرَى وَلَكِنْ تَصْدِيقَ الَّذِي بَيْنَ يَدَيْهِ وَتَفْصِيلَ كُلِّ شَيْءٍوَهُدًى وَرَحْمَةً لِقَوْمٍ يُؤْمِنُونَ))

Tip of the iceberg

This blog was meant to be a diversified blog tackling anything but the events that this country went through made most of the posts go in certain circles. Here is a sort of a different post I hope you like it.

Or not, for this type of posts expression is all that matters.

A typical "me" would never share such a post so bear with my "crabness" and kindly refrain from any cheeky commentary or questions.

You'd think she's the ultimate beauty. That godly blend of poise, grace and a figure befitting Aphrodite herself and that there is nothing to top that!

That is until she starts speaking...

And it's like a thousand enchanting melodies waltzing, grabbing your heart throwing it up high in the air and throwing it down just to catch it before it hits ground to toss it around again.

Words of such eloquence and wit worthy of a Shakespearian Capulot descendent.

You'd think she's the ultimate beauty and there's nothing to top that so you draw her a portrait, crown it with a frame, weave your most gentle words, set up a museum and prepare her immortalizing ceremony, and there is nothing to top that!

But she leaves all that...

And she pulls apart the ceremony with a weary and disinterested sigh, and walks away with you.

And there is nothing to top that!

مش دفاعاً عن الفسدانين

مكتبتش بقالي فتره عشان مكنش عندي حاجه اضيفها، ناس كتير طبعها تتكلم بس ألي بيقولو حاجه قليلين.

و عدم اللموأخزه أنا بطبعي تفكيري غير منقاد إلا بالترتيبات ألي بيمليها عليه عقلي، يعني لو الرأي العام اتفق على حاجه و مخي عمل error معرفش أدوس cancel. يا أمه أصلح ال-error أو أعيش بيه منور كده في وشي و قرفني.

بالظبط بقه زي موضوع الشرطه و الشهداء و القصاص إلى اخره، في حاجه في الموضوع معصلجه معايا ربما لأني من الفلول المضاده أو جوز امي في المجلس العسكري أو قرابتي الوطيده بحماده شنح.

أنا الصراحه مليش في القانون بس ألي أعرفه أن في قتل خطأ و في قتل مع سبق الأصرار و الترصد و ضباط الشرطه ميمشيش عليهم الاتنين. معلش كمل معايا و متقفش بدري. دلوقتي الضباط ألي كانو موجودين يوم 28 يناير مش كانو زي الجندي بتاع الجيش ألي في معركه؟ أخد أمر و نفذه بكل بساطه و لو خالف الأمر مش يبقى بيخون الوطن؟ اه، بالنسبه له في موقعه دي تعتبر خيانه و يتشد و يتسجن كمان لمخالفة أمر مباشر! 

مهو في عقيدته القتاليه من يوم ما دخل كليه الشرطه - أن كان واسطه ولا رشوه أو الاتنين - و هو شاب حماده كده عنده 17 سنه و قلوله "أنت بتخدم مصر" تقوم أنت عايزه بعد عشر سنين بعد ما بقه محمد باشا تقوله لا أنت مبتخدمش أنت مجرم....صعبه دي!!

بلاش الكلام ده....سيبك منه، كل ده في داهيه.

مجرم و أبن ستين و قتال قتله و خرج من الخدمه و اتحكم و أخد اعدام....أفهم أنا بقه الشب الملازم أول ولا تاني ألي لسه أمور و متخرج كده المفروض ينفذ أوامر ازاي بعد كده؟ يعني لو جاله أمر يهجم على وكر بتاع أي نشاط اجرامي بتاع أي بلا أزرق، هينفذه ولا هيعد يسرح و يشوف الكلام ده فيه دم و مكن حد يتنش في المعركه و يطلع غلبان و يقوم هو كمان يتشد زي زميله!

 و والنبي بلاش كلام أبله فاهيتا بتاع نحل الشرطه ولا ندي كورسات ست شهور لخريجي حقوق دي 

أنا مش بقول يلا منحاسبش بس في شيء غير مستوي، و مش بسفه من أفعل الثورجيه و أنا عارف أنهم الأصدق نية و الأطهر في المقصد وسط كل القوى السياسيه الموجوده على الساحه لكن دائما و أبدا ينقصهم النظره البعيده أو الحيز الأوسع من الصوره. 

عمتاً أنا ممكن أكون مش واضح بس هو زي ما الأمام الشافعي قال "قد أكون انتهيت هنا و لكنها في قلبي لا تستوي" 

نهايته. نفسي نسمع و نعقل كلام الحج نلسون منديلا ألي جه فيها

 "عليكم أن تتذكروا أن أتباع النظام السابق في النهاية مواطنون ينتمون لهذا البلد، فاحتواؤهم ومسامحتهم هي أكبر هدية للبلاد في هذه المرحلة، ثم إنه لا يمكن جمعهم ورميهم في البحر أو تحييدهم نهائيا ثم إن لهم الحق في العبير عن أنفسهم وهو حق ينبغي أن يكون احترامه من أبجديات ما بعد الثورة."*

بالمناسبه أنا بتكلم على جزئية الشرطه بس و سايب بقيت الطلبات ربما عشان شرف ركز عليه و العيسوي قفش بعديها و كده 

أكيد جانبني الصواب النهارده لكن أرجو أني أكون أصبت أكتر ما أخطأت.

و زي كل مره...ربنا يهدينا للحق لأن الحق أحق أن يتبع.

*مقالة رسالة نلسون منديلا للثوار العرب http://www.alakhbar.info/18529-0-5-F-CF-F-F0--FB.html 

عشان ميجيش الدور عليك........بعد لؤي نجاتي

لؤي نجاتي شاب مصري عنده واحد وعشرين سنه بيحب بلده، اتقبض عليه وهيحاكم عسكريا بتهمة البلطجه.
لؤي  ناشط على تويتر أنا مش عامله فولو بس عارفه كويس لأنه من الموجودين من زمان من قبل الثورة ومن زمان عارف غيرته على بلده وحماسه لمصالحها والاهم أني عارف أنه وسطي في ارائه أو على الاقل مهواش جعجاع زي ناس كتير.


عمري ما كنت بشوف موضوع أنهاءالمحاكمات العسكرية للمدنيين على أنها أولوية في الوقت الحالي والسبب هو أني شايف أهميتها للفترة اللي احنا فيها خصوصا في الحته بتاعت البلطجه "اللي بجد" والانفلات الامني اللي كان موجود (بالمناسبه احنا في حالة طواريء بجد مش من بتوع مبارك)

بس الموضوع ابتدى يوسع من الجيش فربما مينا ذكري كان متطرف في ارائه في مدونته لكن مش مبرر للي حصل معاه ومع غيره لكن وصول الموضوع لواحد زي لوءى يبقى ناقوس خطر لينا جميعا ان ممكن المحكمة توصل لأي حد فينا.

 أنا هنا بعترف بتغيير موقفي ورفع درجة الأولوية لوقف المحاكمات العسكرية للمدنيين.  ويحضرني هنا قول لأحد المواطنين الالمان أيام الحكم النازي


"جاءوا أولا للقبض على الشيوعيين 
                                        ولم ادافع عنهم لأني لم أكن شيوعا
ثم  جاءوا للقبض على اليهود 
                                         ولم ادافع عنهم لأني لم أكن يهوديا
ثم جاءوا للقبض على عمال النقابات
                                          ولم ادافع عنهم لأني لست نقابيا
ثم جاءوا للقبض على الكاثوليك 
                                         ولم ادافع  عنهم لأني بروتستانتي 
ثم  جاءوا للقبض علي
                                         وفي ذلك الحين لم يتبق أحد للدفاع عني"
                                                                                   مارتين نيموللر 


اعتقد جه الوقت أننا نطالب (تاني) أننا نعمل كمواطنين شرفاء أحرار ولو وجه لحد فينا اتهام يبقى لينا حق الدفاع عن النفس أمام قضاء مدني بشفافيه وعدالة 




الطبيعي ان التدوينه تخلص هنا بس في نقطه حبيت اضيفها في الاخر عشان تبقى واضحة ومنوره كده. لؤى متقبضش عليه لوحده، كان معه أكثر من أربعين واحد كمان بس لأنهم مش نخبة وملهمش حد على تويتر أو غيره فمحدش بيسأل فيهم.
الموضوع أكبر من شخص اتقبض عليه.....ولو سكت يبقى أعرف ان دورك مش بعيد

25

You caused much pain coming into a world quite accustomed to agony and despair, a world where happiness is at oftentimes considered a lost cause, however, laughter shall always break through leading waves of hope as you will always believe in the good of the people.

You shall seek happiness relentlessly and you shall do whatever you do bearing in mind that all that shall pile up like beads in a rosary that once full it shall be sealed and divinely tagged "heaven"

In order to fill that rosary correctly and thus earn that tag, here is your oath.

One year from now:

• You will follow your heart and start your masters in the field you want not what sounds right.
• You shall secure the needed finances away from your parent via any possible method, even the most unorthodox of them.
• You'll be able to tell a Monet from a Manet
• You will carry on reading most aggressively and you shall write like your very survival depends on it
• By god find a way to make your writings more friendly and attractive in style
• You will make sure your great mother is always preserving you with her blessings
• You will be happy.

In 25 years from now:

• You will be a man of value by then, rather than a man of success
• You will start to smell the fresh scent of fulfilment 
• You'll be published by then, in several languages
• You'll be the greatest facilitator of the success of your subordinates, you'll grow up respecting your elders
• you'll still be hitting the gym like you're in your early 20s
• Know that you'll hit bottom several times but rise again and again each time, you'll take a page out of your grandfather's book of patience and faith
• Be a great father, husband and friend of both
• You'll keep your serious brow of silliness
• You'll partake in the rise of Egypt and help preserve it's godly graceful blend of moderation
• You will accomplish the following (Jump out of a plane, rock a Rio festival, attend Coldplay live, go on a pilgrimage)
• You might as well buy MUFC off the greedy Glazers
• Be happy, man

I solemnly swear that I'll do my utmost to be all that with the help and grace of god.

Sherief Hassan

Turning 25 on 27/06/2011

أصول وأولويات

كنت قد كتبت في التدوينة الأخيرة عن ما ارتأيت في ظاهرة اجتماعيه - دينيه ..... أو دينيه - اجتماعيه كما تحلو لكم التسمية، وكما كان متوقع قوبلت بهجوم عنيف في بعض الوقت وجاءت بعض الردود الاخرى على درجة ن الرقي في الاتفاق الجزئي أو الاختلف الكلي والبعض الاخر اتفق كليا.

وبالطبع ولحساسية الطرح لدى البعض نشبت النقاشات المطولة التي أخذت قدرا واسع من الجدل دون طائل حتى كتابة هذه السطور، فلا استطعت تقريبهم للب الموضوع و لا اقتنعت بعدم جواز طرحي من حيث المبدأ، ولاتخاذ النقد صورة الهجوم (الفكري) فاحكمت غريزتي علي اتخاذي وضعية المدافع راد الفعل إلى ان جاء في زخم كل هذا رد تأخر بعض الشيء كنسمة هواء عليل في ليلة صيف رطب أعادتني إلى نقطة ابتدائي وهي التي لم تكن قط الحجاب لذاته وانما كان الحجاب هو الظاهر أو المثل الموضح للجوهر، ولكن النقاش أبعدني عن الاصل.

جاء هذا الرد من شخص أعلم بميوله للفكر "الاسلامي" ولكنه لم يجزع من الطرح مثلما جزعت الغالبية وانا استمسك بالجوهر بطريقة شرحت صدري.
اترككم مع الرد مع ملاحظة أنها كانت على موقع تويتر ومنقسمة إلى أجزاء من 140 حركه الواحدة.

"على فكرة قريت البوست بتاع الحجاب بتاعك و رغم كوني إسلامي ذو خلفية سلفية أحيانا إلا اني أتفق معك فيما ذهبت اليه

نعطي التفاصيل حجم أكبر من حجمها أحيانا و ننسى معها ... المقصد من الأشياء ..و لو فهمنا المقاصد سنرى التفاصيل بدون عناء مطبقة وحدها

كنت من فترة كده قريت كتاب عجيب للمسيري ... قالك فيه نموذج كامن يحكم سلوك البشر له تجليان أحدهما جواني و الآخر براني

بمعنى أبسط ... هناك ما هو جوهري و هناك ما يمكن اعتباره نواتج أو أعراض بادية عن هذا الجوهري

العجيب في بلادنا أننا نحارب بكل شكل لإثبات اقتناعنا و ايماننا بالجوهر عن طريق التفنن في اظهار تلك الظواهر الخارجية

و ننسى و لا نريد أن نتعمق في فهم الجوهر و اعتناقه .. وهو ما لو حدث ... بالضرورة ستكون مظاهرنا من أحد تجليات هذا الإعتناق

بالضبط زي موضوع المادة التانية من الدستور بالضبط ... وزي اللحية ... وزي الحجاب ... و زي تحريم الموسيقى و كله نفس المرض

يعني أطلت بس كنت عاوز أعلق فعلا على البوست بتاعك"

بكل بساطه تقبل الرأي لجوهره ولم يتعرض لما اختلف فيه فكان البناء.

ومن هنا قررت المضى قدما وغلق النقاش الفرعي والعودة إلى الأصول - هذا اذا سمحلي أصحاب النقاش - وهذا ليس هروبا من النقاش بل هو أحقاقا لما أردتة عندما بدأت في كتابة التدوينة وايضا للخروج من خانة رد الفعل إلى الفعل* فربما خانني التعبير أو لم أوفق في شرح فكرتي بطلاقة كافيه ولكن الفكره بداخل قلبي تستقيم.

والمصادفة اقتضت نشأة قاسم مشترك في كثير من تدويناتى حتى الأن وهو الاهتمام بالأصل على حساب الفرع، فالبناء على قاعدة عريضة مستقيمة توءدي إلى استواء البناء وكذلك إذا كانت القاعدة ضيقة وان كانت سويه فلن يصلح بناء ما هو أعرض عليها فمالت ومال البناء.

خلاصة: حافظوا على الأصول ورتبوا الأولويات هو أقرب للحق والحق أحق ان يتبع 



*Active and reactive people راجع كتاب كوفي عن العادات السبع 

الحجاب ...... تدوينه صادمه

أعلم ان هذه التدوينة لن تروق إلى الكثير منكم، فهي تتناول أحدى مسلمات العصر الحالي وصراحه لم أكن انتوى الكتابة عن هذا الموضوع إلى ان بعض الاحداث الراهنة دفعتني لذلك.

أنا اتكلم عن "الحجاب" وعدم فرضيته 

بداية أود ان أوضح بعض الأساسيات

• أنا لا أفتي في الدين 
• أنا لا أهاجم الحجاب أو المحجبات
• أنا لا أدعو للعري أو عدم الاحتشام أو ما شابه 

اذا نظرنا إلى تعاليم الاسلام وجدناها تنقسم إلى قسمين: عقائد وأعمال. أما العقائد فهي أهم أصل في أصول الاسلام فهي الاعتقاد بالله ووحدانيته وانه أوحى للانبياء وان هناك حياة بعد الممات والحساب إلى اخره.

واما الأعمال فتنقسم إلى أعمال اساسيه وهي الصلاه والزكاة والصوم والحج؛ وهناك الأخلاق التي تنقسم هي أيضا إلى نوعين: نوع وهو اللياقة ونوع اخر اسمى وهو ما تدعو إليه الأخلاق مثل الوفاء بالوعد والصبر في الشدائد والعفو عند المقدرة.

ولعل هذه الأخلاق بهذه الاهميه الدينيه فقدت الكثير من أهميتها في عصرنا لاهتمام الدعاه بما قل في الاهميه.

أطلت في المقدمة ولكن كان لا بد من تحديد الأصول أو الأولويات ومنها نصل إلى أصل موضوعنا المطروح.

المفهوم الحالي للحجاب أخذ أكبر من حجمه ومع هذا التعظيم اختل مقياس الاهمية فتركنا بعض الأخلاق، وقبل الأنقلاب علي واتهامي ب"الافتاء" في الدين وهو ليس حق لي - وقد أسلفت في انكار ذلك - دعوني أوضح ان فرضية الحجاب مختلف عليها فهي قضيه فرعية في الاصل والطبيعي أنه حين يختلف العلماء على موضوع يكون لنا الحق في الاختيار وانا من هنا اخترت رأي عدم الفرضية وسأسوق مبررات الأن.

غطاء الرأس والخمار وغير ذلك هي أزياء متواجده من قبل عصر الدعوة وهناك الكثير من الشواهد التي تدل على ذلك، أما المجتمع المصري فالصور التي نقلت مع الثورة الفرنسية تدل على ان الازياء المصريه التقليدية تختلف جوهريا عن القواعد المطروحة للحجاب الأن.

اذا فالاصل هو التقليد الاجتماعي وليس الاسلام.

وتعد أكبر حجه لصالح فرضية الحجاب هو ما جاء في سورة النور << وَقُلْ لِلْمُؤْمِنَاتِ يَغْضُضْنَ مِنْ أَبْصَارِهِنَّ وَيَحْفَظْنَ فُرُوجَهُنَّ وَلا يُبْدِينَ زِينَتَهُنَّ إِلَّا مَا ظَهَرَ مِنْهَا وَلْيَضْرِبْنَ بِخُمُرِهِنَّ عَلَى جُيُوبِهِنَّ>> وسبب نزول هذه الآية أن النساء فى زمن النبى وما قبله كن يرتدين الأخمرة المغطية للرءوس ويسدلنها من وراء الظهر، وطلبت الآية من المؤمنات إسدال الخمار على الجيوب أى فتحة الصدر، وعلة الحكم فى هذه الآية هى تعديل عرف كان قائما وقت نزولها، ولأن ظهورهن بصدر بارز عار هو صورة يرفضها الإسلام، ومن ثم قصدت الآية تغطية الصدر دون أن تقصد وضع زى بعينه أو تنص على فرضية الحجاب أو غطاء الرأس، وكان الهدف والعلة من ذلك هو التمييز بين المسلمات وغير المسلمات اللاتى كن يكشفن عن صدورهن.

والاصل في موضوع رداء المرأة عامتا هو الحشمة وان الاسلام منع ارتداء ما يكشف المفاتن ومنع ما يوحي بالاغراء أو الملابس الشفافة أو التي تحدد الجسد.

من باب الاجمال يجدر الاشاره ان مع انتشار الحجاب في المجتمع بدأ البعض التمييز ضد الغير محجبات ولكن هذا حديث اخر لمقام اخر.

نهاية، الحجاب فضل عظيم ولكن الحجاب الصحيح المبني على الحشمة ومن الاحرى في جميع الاحوال الانتهاء من الأصول قبل التركيز على الفضول.

والله أعلم 

والحق  أحق ان يتبع.........مش الرأي المنتشر

أيها الاسلامي*

 

أكتب اليك متازما مما آل إليه الوضع و يحتمل أن يسوءاليه الحال، أنا المسلم الذي نقّصت من شأنه و حقّرت من رأيه، أنا المحافظ على فروضي و من كنت يوما أدعو لعودة خلافه اسلاميه في صورة مثاليه (يوتوبيا) و لكن مع صعود من تنتمي إليهم تراجعت عن دعواي.
أنا من وجد في الاسلام العزة في الدنيا و الرجاء في الآخرة.
 

تبرأت منك ووصفّتك و فصّلتك و أنا أعي تبعات هذا الفعل و لكن ما باليد حيله، فانا الذي حقّرت من شأن أمه، نعم أنت حقّرت من شأن أمي ذلك الكائن الملائكي الذي ناطح في قصة كفاحه الدرامه الاغريقيه شده، أسأت إليها حين سكت على زميلك الذي قال أن المرأه ليس لها سوى المنزل و كفى و زعم أنها أقل شئنا من الرجل و سكت على من قال أنها أقل ذكاءا أو ميزها بأي تمييز حقير يدنو بها إلى مراتب تفكيره الدنيا.
 

تبرأت منك حين حقرت من شأن ديني و ساهمت في زيادة أعداد أوثان العالم، نعم ساهمت في الزياده، أما سمعت قول الشيخ الغزالي "إن انتشار الكفر في العالم يحمل نصف أوزاره متدينون، بغضوَا الله إلى خلقه بسوء صنيعهم و سوء كلامهم" أما تفكرت فيه؟ ألم ترى كيف حقرت من شأن ديني حين أدخلته فيما ليس فيه؟ حين اعتبرت فروع الفروع المختلف عليها اصول؟ حين حرمت ما أحله الله؟ أو حين رفعت من شأن من يأكل ما تأكل و يشرب ما تشرب إلى منزلة المنزّه عن الهوى.
ومالي أرى الكثير منكم يكاد يوءله شيخه، ألم يدركك قول الأمام الشافعي لتلاَمذته "كل ما قلت لكم فلم تشهد عليه عقولكم و نقلته وتروه حقا فلا تقبلوه، فان العقل مضطر إلى قبول الحق" أفلا تعقل؟
 

أعلم أن منكم من هو طيب النيه و لكن بكم من يستغل الدين للوصول إلى غايته و منكم الكثير من أبتعد عن قوله تعالى (جعلناكم أمه وسطا)** فاستسهلت الأتباع و خشيت اغضَاب " الشيوخ" و الله أحق أن تخشاه.
 

نهاية: أنا لاقول لا تتبع "شيخك" و لكن أدعوك لاتباع الحق و الحق أحق أن يتبع.

هذا عـتابـك إلا أنـه مقـة         قـد ضمـن الدر*** إلا أنه كلم

*بكره كلمة اسلامي دي، أصل أنا مش بوذي يعني مع احترام البوذيين.

**سورة البقره

***هو مش در قوي طبعا بس المقصود هو المعنى اللي المتنبي قاله في بيته الشهير

عن التفكير

كثر الصدام في الأونه الأخيره  في أمور شتى و هو أمرطبيعي في ظل مرحلة التغيرات السياسيه التي نمر بها خاصة خروج الكثير من القوة السياسيه من الظل إلى النور بعد زوال عصر استبداد الحاكم و لكنا دخلنا في عصر استبداد الرأي، فالفطره البشريه تنطلق حين تصطدم بشخص غير مألوف فتبدأ بتقصي أوجه التشابه ثم تنتقل سريعا إلى البحث عن الاختلافات و هنا تكمن المشكله، فمقدارنا السياسي كمصريين لا يتعدى طور الطفوله و لسنا بعد على استعداد لتقبل الآخر و إنما نرضخ إلى خوفنا من المجهول و نرفض الآخر -الذي هو ليس بآخر- رفضا مطلقا.

من هنا قوبلت مرات عديده بنقد شديد لآراء و اتهمت بالتفكير ذلك الجرم الكبير  و هو ما لم أستطيع تملك نفسي في حينه، و عليه قررت أن أبحث قليلا عن التفكير و ما ذكر دينيا حيث كان الرفض المفجع مبني على حجه دينيه واهيه، فالبعض يريدونك أن تنصت كالصنم و أن تتبعهم كالعبد و كله محلى بالصبغه الدينيه الزائفه.

القرآن الكريم سلك في دعوته إلى الأيمان بالله و صفاته من علم و قدره و وحدانيه مسلكا يثير العقل، و دعا إلى التأمل إلى ما في العالم ( أَوَلَمْ يَنْظُرُوا فِي مَلَكُوتِ السَّمَاوَاتِ وَالْأَرْضِ وَمَا خَلَقَ اللَّهُ مِنْ شَيْءٍ) الأعراف و (فَلْيَنْظُرِ الْإِنْسَانُ مِمَّ خُلِقَ) إلى كثير من هذه الأمثال التي جاء الكثير منها بصيغه الأمر.

و كذلك ذكر في القرآن عن الحكمه في مواضع كثيره (اًيُؤْتِي الحِكْمَةَ مَن يَشَاءُ وَمَن يُؤْتَ الحِكْمَةَ فَقَدْ أُوتِيَ خَيْراً كَثِير) و من هنا يسهل الاستنباط أن العلم و الحكمه أنما هم فضل و نعمه و رزق من عند الله.
فيقصة سيدنا موسى عليه السلام(لَا نَسْقِي حَتَّى يُصْدِرَ الرِّعَاء وَأَبُونَا شَيْخٌ كَبِيرٌ) لم يمنع موسى دين مصطنع من تلمس حاجة هذه الشريحه للارتواء، فروا لهم من مناهل المعرفه و سقى لهما ثم تولى إلى ربه و دعا (رَبّ إِنِّي لِمَا أَنْزَلْت إِلَيَّ مِنْ خَيْر فَقِير)فنحن فقراء إلى الله و معارفه و حقائقه العقليه و المعرفيه، فلله هو مصدر المعارف و قد وهب كل انسان الأداه للوصول إليها و بها أساسات دينه و سلاح دنياه و تلك الأداه هي العقل


و الأخطر من ذلك كله هو الحجج القرآنيه على هلاك الأمم و التي جاءت في مواضع كثيره و كانت دائما ما تنتهي ب (أفلا يعقلون - أفلا يفقهون - أفلا ينظرون - أفلا يتدبرون) و جاء في آخر سورة يوسف (لَقَدْ كَانَ فِي قَصَصِهِمْ عِبْرَةٌ لِأُوْلِي الأَلْبَابِ)فلم يهلك قوم إلا و و بدأ الخطأ في التسليم لاحد "العلماء" و ترك التفكير و الاستسلام للتقليد الأعمى
.

مش نفكر بقى شويه ولا إيه؟

القاهره ٣٠/٠٥.٢٠١١

عبقرية التحرير

جزعت لمجرد فكرة ثوره أخرى لاسباب شرحتها قبل ذلك في الشأن الدخلي و لكن على صعيد آخر كانت الصوره التاريخيه تدق ناقوس خطر لهذه الفكره، فأول ما طرق بذهني كان تسلسل الثورة الروسيه إبان الحرب العالميه الأولى و ثورة البلاشفه و نهاية بتولي لينين مقاليد البلاد و ما صاحب هذا من فوضى أدت إلى حتمية صعود حاكم ذو قبضة حديدية يعيد الاستقرار إلى البلاد.
و النتيجه التي الت إليها الدوله هو تولي ديكتاتور سفاح بنا مجد لبلده على أنقاض الحريه.

لكن ما حدث في السابع و العشرون من من مايو لم يكن ثورة و أنما حشد ثوري لضغط و توكيد المطالب و في رأيي أن "الجمع" تعد عبقريه مصريه في طرح بديل ديمقراطي للمرحله الانتقاليه، فبدلا من استفراد المجلس العسكري بالحكم في ظل غياب مجلس الشعب أو أي اليه تتيح أشترك الشعب في الحكم، أقحم الشعب نفسه من بوابة التحرير شريكا في الحكم و أداة ضغط على الحاكم لتنفيذ مطالبه التي لا يوجد ما يوصلها اليه في ظل انكباب الأخوان (القوه الكبرى على الساحه) على التخطيط للوصول للحكم و انشغال باقي الأطياف السياسيه في معارك جانبيه ليست ذات أهميه تذكر.

أعتقد أن التحدي الأكبر في هذه الفتره هو تحديد الأولويات، فتتبع أصل أي مشكله نواجهها سيصل بنا إلى هذه النقطه الابتدائيه، تحديد الأولويات. فعندما يكون الاساس سليما لن نختلف كثيرا في فروع لن تغير في واقعنا كثير و لن تشكل من المستقبل شيء يذكر.

نهاية أتوجه بالتحيه للوعي الموجود في الشخصيه المصريه التي ابتدعت و طورت الديمقراطيه الشعبيه (ملهاش دعوه بشعبيه بتاعت القذافي) فارجو أن تتواجدهذه "الجمع"  كلما اقتضت الحاجه إلى أن ننتخب مجلس شعب ينقل صدى الشعب في الحكم و بعدها فلينصرف كل إلى موقعه في البناء في أيام الأسبوع و تعود الجمعه للراحه كما كانت

رساله من سوريا

غريبه الطبيعه البشريه، لما حد يموت بنجزع لكن لما ناس كتير بتموت الموضوع بيبقى عادي بعد فتره. زي ما أحد السفاحين الكبار قال في يوم من الأيام "إن موت رجل واحد فاجعه؛ و موت الملايين مجرد احصاء" ستالين

تذكرت المقوله دي دلوقتي لما جاتلي رساله من سوريا من شخصيه كانت بعثت لي برسالة تهنئه بعد تنحي الرئيس في فبراير الماضي و ساعتها قلتلها عقبالكوا و ردت قالت لا أنا خايفه. لكن واضح أن سوريا عدت نقطة الا رجوع و أيام بشار السفاح أصبحت معدوده.
و ده نص الرساله 

فاكر ياشريف لما قلتلك انا بخاف وانت قلتلي كلنا في الاول كنا خايفين صدقني وقتها حسيت انو كلام في كلام وان الخوف اللي جواي مش هيروح ابدا ...و حبيت اقلك دلوقت كان معاك حق وانا دلوقت متصالحة مع نفسي ومش خايفة الا من ربنا وبطالب باعلى صوتي بالحرية وسوريا وامن سوريا بيمشي بدمي رغم كل اللي بيحصل رغم ان الشعب السوري بيمشي على نهر من دم نحنا بنطلع و ضرب النار مباشر علينا وكل يوم بيموت ناس كتير شباب وبنات من كل الاعمار وخاصة في مدينتي (حمص) بس كمان نحنا مؤمنين بالقضية وان النصر بيحتاج ديما لتضحية شبابنا غالي بس الوطن أغلى بكتير

انا عارفة ان الوضع بمصر لسى مكركب بس كمان عارفة ومتأكدة إن مصر زي الهرم وعمرها مش تتهز ادعو لخواتكم في سوريا اللي بيموتو كل يوم بأيد اخواتهم بردو

مفيش قدامي غير أني ادعلهم دلوقتي و أسألكم أنتو كمان تدعولهم ربنا يفك كربتهم
 

الجيش بين سكرات موت النظام السابق و عنفوان شباب الثوره (تدوينه مختلفه)

اتعودت أفكر و أحاول أطلع برأي حتى لو طلع غلط يبقى اكرملي من أني أمشي ورا الأغلبيه زي القطيع، مش حبا في الاختلاف ولا عشان صوتي يبان و اللي متابعني هيعرف أني مش بسعي ورا الصيت و لكن أل "originality"
و عشان أفضل "original" لازم انقح المدخلات اللي عندي و عليه فأي حد منفعل أو بيحاول يستعطفني برفع درجة الترقب أكثر و أي حد كلامه حلو و حاسس أنه جي على هواية بفكر فيه أكتر و أكتر؛ و من هنا  أدخل في موضوعنا.

كل الشباب على تويتر المؤثرين منهم و أصحاب الفولورز الكتير اتجمعوا على مهاجمة الجيش و المجلس الاعلى للقوات المسلحه و أنا عشان اللي ذكرته قبل كده فندت كل اللي اتقال أكتر من مره و لقيت نوايا طيبه و اندفاع غير منطقي أكتر.
فمثلا لو مسكنا المحاكمة لرموز النظام السابق لازم نراعي أن الاستعجال مش في صالح النيابه اللي هي في إديها أوراق اللعبه القضائيه مش الجيش و لازم نعرف البديهي و هو أن القاضي بيحكم بالأوراق مش بالي أنا و أنت عارفينه.
في موضوع سفارة اسرائيل لازم ناخد بالنا أن البلد في حالة طوارئ بجد مش بتوع مبارك و أن مجرد فكرة أقتحم السفاره بتدي الجيش الحق في القبض و محاكمة القائمين على ده، في فرق كبير بين المظاهره السلميه و الشغب.
بالمناسبه المحكمة العسكريه للمدنيين في ظل حالة الطوارئ قانون يجوز برغم بشاعة الموضوع.
تخيلو معايا فريق كوره و الفريق خسران بجونين و فاضل عشر دقايق. هل نسيب الجمهور يقرر أدارة العشر دقايق دي؟ أكيد لا؛ الانفعاليه هتودي الفريق في داهيه عشان كده اللي يمسك لازم يبقى عنده روءيه متكامله و ثبات انفعالي و الا هتبقى غوغاء.
عامتا اللي عنده مطالب ينتخب حكومه تحققله مطالبه و لو مقدرتش يشيلها و يجيب واحده غيرها و والنبي بلاش نظريات المؤامره الغير مبرره.
نهايته؛ الجيش مش ملاك و غلط كتير و لازم يبقالو حسابه بس هي ظروف صعبه و أنا مع الضغط الشعبي لغاية منوصل لانتخاب رئيس و عمل دستور.

ده كان رأي مختلف للي بيتكتب النهارده، مش حبا في الاختلاف بس عشان غلس عليكو و خليكو تفكروا

و السلامو عليكو
القاهره في ٢٣/٥/٢٠١١
٢:٣٠ صباحا

عوده إلى حياة الجاهليه

بطبيعة الحال ستتناول هذه التدوينه الأحداث الجاريه، و كنت أود لو خرجت بها مبكرا عن هذا و لكن ما باليد حيله في العمل، و الكتابه تحتاج لشيء من التفرغ.
أنا الآن بصدد انتقاد فكر خاطيء من جذوره و أود أولا أن أوضح أن كلامي و ان كان بصيغه معممه في أحيان فليست النيه التعميم المطلق
 

بداية أود أن أشرح لفظ الاسلام و معناه باقتضاب، فاذا تتبعنا مادة (س ل م) رأينا أن معنى الاسلام المسالمه و ضد المسالمه الحرب و الخصام و جاء في القرآن (وَعِبَادُ الرَّحْمَنِ الَّذِينَ يَمْشُونَ عَلَى الْأَرْضِ هَوْنًا وَإِذَا خَاطَبَهُمُ الْجَاهِلُونَ قَالُوا سَلَامًا)
و من هذه الأيه نصل إلى سبب تسمية عصر ما قبل الاسلام بالجاهليه.
فالجاهليه ليست من الجهل (ضد العلم) و لكن من الجهل الذي هو الغضب و العصبيه لقبيله أو ما تنتمي اليه و هي أمور كانت هي السمه المميزه لحياة العرب قبل الاسلام.
 
ننتقل هنا إلى المشهد الحالي و ما حدث منذ ليلتان (السبت السابع من مايو) و ثورة من يطلق عليهم لفظ المسلمين و استنفارهم بشيء من الانفه و كثير من العصبيه في تطبيق مباشر لمباديء الجاهليه التي جاء الاسلام ليدحضها و كأن الرغبه الدائمه لنقل ما كان عليه السلف وصل إلى أبعاد زمنيه جديده بأن وصلوا لعصر ما قبل الدعوه.
المشكله الأكبر من هذه الهفوه الزمنيه هي مخالفة الأمر الالهي المباشر (يَا أَيُّهَا الَّذِينَ آمَنُوا إِن جَاءكُمْ فَاسِقٌ بِنَبَأٍ فَتَبَيَّنُوا أَن تُصِيبُوا قَوْماً بِجَهَالَةٍ فَتُصْبِحُوا عَلَى مَا فَعَلْتُمْ نَادِمِينَ) و هنا دليل قرآني آخر يوضح أن الجاهليه قد تسللت إلى زمننا هذا في العام ١٤٣٢ هجريا.
 

نهاية، لا أزال أحمل الأمال العظيمه لهذة البلد التي دعا لها سيدنا نوح لحفيده مصراييم الذي عمر مصر (اللهمّ بارك فيه وذريته وأسكنه الأرض المباركة أمّ البلاد وغوث العباد التي نهرها أفضل أنهار الدنيا، اللهم أجعل في تلك الأرض أفضل البركات وسخر وذلل له ولولده الأرض وقوّهم عليها) و لكن المسئوليه تقع علينا جميعا بأن نعمل على استئصال آفة الجاهليه العصبيه الغاشمه من قلوبنا قبل أن نوعظ الغير، فالغير شروره كافيه لدفنه كما شاء المولى و فضحه في ما جرى من أحداث.

القاهره في فجر ١٠/٥/٢٠١١ 

كسر عين (نظرية مؤامره)

لدى الشخصيات القمعيه نظريه كلاسيكيه في السيطره و هي أن يظل المحكوم مقهور نفسيا و يشعر بالذل و الضعف فيقطع عليه الطريق من المنشأ و لا يجرأ على مجرد التفكير في أي نزعات استقلالية أو تكوين أي أفعال ايجابيه.

ورد إلى ذهني هذا النموذج إبان مقتل أسامه بن لادن، فقد رجحت العديد من المصادر فرضية أنالاداره الأمريكيه كانت تعلم موقع رئيس تنظيم القاعده و تتابعه عن كثب منذ فتره ليست بالوجيزه (منذ عام ٢٠٠٨) و عند صحه هذه الفرضيه يجب الوقوف عند بعض النقاط.

• سيطرة اللوبي الصهيوني على الاداره الأمريكيه 
• الثورات العربيه و تأثيرها على معنويات و تطلعات العرب و المسلمين
• أعادت بعث الأمل و الايمان بالقدره على تحقيق العمل و الطموحات التي كبتت بفعل فاعل 
• تحقيق المصالحه بين الأخوة الأعداء، فتح و حماس مما يقوي من موقفهم في النزاع مع اسرائيل
• تنامي التأثير الشعبي على حكومات العربيه المختلفه 

فهذه النقاط أذا ما وضعت سويا و نظر اليها نصل إلى نتيجه مفادها أن العرب ما أن يفرغوا من ترتيب بيتهم الدخلي سيتجهوا إلى محاولة حل القضيه الفلسطينيه بما أوتوا من قوه إن كانت "ناعمه" أو غيرها.

و على ذلك فكان لا مفر من رد استباقي يبدأ ب (قص ريش) العرب خاصه و المسلمين عامه و كبدايه جاء هذا الرد باغتيال أحد رموز المقاومه الاسلاميه  - حتى لو كانت متطرفه - و دفنه بحرا في فجر يوم حتى يصحى العرب على هذا الخبر و يأخذ الحيز الأكبر من التفكير قبل انشغال العقل بالاشغال اليوميه.

هذه اللطمه النفسيه قد تكون بدايه لبعض الحركات الأخرى التي ستكون تحت شعار فرد العضلات و توكيد السيطرة ومن الآخر "متنسوش نفسكو".

القاهره في صباح الثالث من مايو ٢٠١١ 

Simple maths

Upon attempting to look at a situation, let it be a news top story or else, due to human nature one must analyze and form some sort of a stand, which usually is with or against, good or bad, right or wrong. In other words the elementary human thought works on black and white as if shades of gray are none-existent.

To see things in shades of gray is not an easy task, it needs one to actually think and more importantly look deep into the matter before forming an opinion where man is more inclined to the simpler black and white labeling which rises with the human capability to a (1,0,0,1) unimaginative machine.

And while one of the brightest minds of the 20th century said "everything should be as simple as possible but not simpler"* I don't call for a complicated life where one over thinks every minor event its only the "simpler" notion that I'm against.

To me those who fail to see things in shads of gray are the selfsame ones who had problems with fraction mathematics, their minds are rather simple or they can't be bothered to open their minds and stop at the whole numbers level of maths.

"Minds are like parachutes, they don't work except when they're open"**

"Elementary, my dear Watson"***

* Albert Einstein

**Mark Zapa

***Sherlock Holmes

الشيطان بيوعظ

الشيطان بيوعظ تعالوا ياولاد
نروح نعرف بيقول أيه
ده الناس بتجيلو من أخر البلاد
أكيد كلامه حلو، أمال كل دول بيحجوله ليه
*****
أنا أعرف أنه بيتكلم عن الجنه و النار
و كل مره يدعي يقوم يلعن الكفار
و اللي حواليه بيبتدوا الكلام بقال الله
و هو يكمل بقال الرسول
و يختم كلامه بتحذير من الهلاك
ما شاء الله، تقولش ملاك؟
*****
ده بيدعوا لنصرة الدين
و بيدعوا كمان للم الحريم
و كلامه كله أكيد سليم
مشفتوش طول دقنه؟ ده بين عليه راجل عظيم
*****
و كل كلامه بيكون في المطلق
 مبيقولش حاجه بين البنين
و ده هيريحنا من الصداع اللي أسمه التفكير
و لو لقينا حد يقرفنا مش مشكله
لأنه هيدينا حق التكفير
*****
كل ده و لسه بتشاوروا عقلكوا؟
طب اقلكوا، ده هيخليينا أحسن ناس في البلاد
مهو بيقول أن أحنا الأسياد
و غيرنا هيمشي ذليل حتى لو كان من أبناء النيل
و كل ده ليه في الدين دليل و دليل
*****
و مع تجليه في حل المشكله
لخص الموضوع و شرحه بطريقه مؤثره
و عرف مدى خطورة العلم و العقول الثائره
و بعدها ريحنا بطريقه مبشره
أن مصدر كل مشاكل العالم الفكره ديه
الفكره الكافره المجوسيه اللي أسمها العلمانيه
اللي هي تبقى الراعي الرسمي للاباحيه
و هتخلى أمك، أيوه أمك أنت متفرقش عن حريم الجاهلية
*****
أنا شخصيا هروح اسلمله نفسي
يقلب فيا زي مهو عايز
دانا لما صدقت هيبقالي لازمه
و حتى ممكن أوصل و اوعظ أنا في الناس....جايز

أنهينا عصر الفراعنه يا سيدي

http://www.youtube.com/watch?v=DqGNQbGXbcc

هذا فيلم قصير مبني على قصه قصيره للكاتب الكبير يوسف أدريس أحد أبرز كتاب القصه القصيره في الأدب العربي. و كنت قد كتبت قبل ذلك منذ حوالي سته أعوام عن حالنا الفرعوني في الحكم الذي بدء منذ خمسة آلاف عام أو يزيد


سالنى انتو ايه
قلت فراعنه يا بيه
بيدينا بالجزمه و بنبوس رجليه
و الكهنه بتسحر و لما بتسحر
كل الناس بتجري وراهم
محنا طيبين و للتفكير ناسيين
و ليه النسيان ده العقل زينه للإنسان
و بيه نعرف كل غلط يبان
دا فرعون مركبش غير عشان الشعب غلبان
و الكهنه مسرحتش بينا غير من التوهان
فيللا يا مصري إنسا السرحان
و فكر ابل ما يفوت الاوان




كنت قد كتبت هذا الشعر العامي منذ قرابة السته أعوام و أزداد فخري به اليوم عند رؤيتي لهذا الفيلم لتوائم تفكيري مع كاتب
يشهد له بالبنان مثل يوسف أدريس.
كنت أيضا قد كتبت مقاله منذ بضعه أيام عن نهاية الحكم الفرعوني مع تنحي الرئيس مبارك في أول ثوره شعبيه مصريه على مدار تاريخها السحيق تخلع حاكمها الإله.
فات العصر الفرعوني كما وصف المؤرخون و بقى نظام الحكم فرعوني الطبع، فلطالما نظرنا - كمصريين - للحكم على صورته كتجلي للإله في صورة حاكم مهمة زادت مفاسده - طالما أبقى على الصبغه المصريه للحكم - فتولدت العصور و الحكام و تباينت مقادير هذا البلد و حظه من المجد و التدني و توالى عليه الغزاه و تم دحرهم جميعا و بقت الشخصيه المصريه أبيه ما زالت تقدس حاكمها منذ
عام ٣٢٠٠ ق.م.






ثرنا و خلعنا حاكمنا و سجلنا تاريخا جديدا و بدأنا عصرا جديدا ليس بفرعونيا و إنما ديمقراطيا يحدد فيه فترة الحاكم مما يضمن عدم تاءليهه و بقى لنا سيف التاريخ حاكما كيف سنحدد مقاديرنا فما زلنا في مرحلة انتقاليه و لكني أثق في هذا الشعب العريق أن يأبى محاولات الكهنه في سحبنا إلى الوراء إلى حيث يتالهون بل و نتقدم إلى الأمام إلى حيث نستحق.

لي عاده

لي عاده
و عادتي خطيئتي
و عادتي في مواقفي
و مواقفي من بنات تفكيري
فتفكيري هو خطيئتي...
بداية ائذنوا لي
ألا أستر علي
و أفضح بعض تفاصيل خطيئتي
فحسب تفكيري الذي أدى إلى محاولات تكفيري
ان الاستئذان أدب
و الأدب و التهذيب هم من أساسات ديني
أتوا مع الرسول ليتمموا مكارم الأخلاق
فكرت
ان الدين لله أولا
و ليس للمشايخ أو الفقهاء أو الناس
فكرت ان الكفار أطلقوا اللحيه
و ليست اللحيه من صميم ديني
بل ولا تزيد صاحبها إلا وقار كبار السن
و ان الاقتداء بالرسول يبدأ بأمانته و صدقه و تواضعه
قبل لحيته و قصر ثوبه
فكرت ان تحقير الناس و ازدراءهم
لجنسهم أو لونهم أو دينهم هو ذنب كبير عند الله
و ارتأيت ان صديقي المسيحي ليس بكافر
فلقد علمت أنه أذا أتهم أحد آخر بالكفر فأحدهما كافر
فكرت
فكرت و قرأت
ان الرسول لم يعط توكيلا حصريا
و لم يأثر الدين على أحد يأمر باسمه
و ان زمن الخلافه قد ولا
و ان في وطني كثر المتاجرين بالدين
المنافقين، الساعين للسلطه على جواد الدين
و ان الله مطلق و سياستنا نسبيه
و قد علمت في هندستي عدم جواز خلط المطلق بالنسبي
فكرت
ان الله أرحم و أعدل من خلقه جميعا
و أنا لست أرسطو و لا العقاد و لا الحكيم
و تفكيري عادتي
حاولت الاقلاع عنها و فشلت
فتلك عاده لا مفر منها
حتى أنها تكثر في منامي
و تهاجمني...حتى في أحلامي

القاهره
٢٦/٣/٢٠١١  

كسر العاده

بسم الله أبدأ، و لكني لا أعلم ما أبدأ و لا إلى أين أذهب، كل ما أعرفه هو أن بداخلي فيض و طاقات فرغت من حج كبتها و آن وقتها.

و رب ضاره نافعه، فأحد أسباب عدم أقدامي على البدء في الكتابه هو ذلك الصديق السيئ -صديق السوء- الانترنت.

فكم من فكره نشأت و توقدت و آن قطفها و لكن تقاعسي على الكمبيوتر أدى إلى عطبها و هروبها من كسلي و تقاعسي.

العاده التي أنا بصدد كسرها هي عادة العزوف عن الكتابه فانا أمن بقدرتي على كتابه شيء ذي قيمه و لكن بهذا العزوف فانه ضرب من المستحيل معرفه حدود هذه المقدره، و أعلم آن بداياتي الكتابيه ستكون متواضعه نسبة إلى ما سيلحق باذن الله

أخترت الكتابه بالعربية لإيماني بان لغتي الأم هي الأقوى عندي و أعرف ان الوقت وحده هو القادر على تطويع أسلوبي ليستقر في مكان ما ما بين الفصحى و العاميه حيث الهدف الاعلى هنا هو السلاسه للقاريء.

يجدر هنا الأشاره إلى نقطتين الأولى هي أنه ستكون هناك بعض الكتابات بالانجليزيه للتواصل مع شريحه أكبر من القراء و ربما أيضا لارضاء غروري من ناحيه، الثانيه هي ان كتاباتي ستكون تعبيرا عن الأفكار المتصارعه برأسي و لن تضع في الاعتبار الذوق العام أو استمالة قدر أوسع من القراء.
هذه الكلمات هي افتتاحية المدونه التي أنا بصدد ابتداءها و لست بعازم على الترويج لها حتى أشعر بأنها وصلت إلى حد أدنى من النضج
و الله المستعان.

القاهره
٢٤/٣/٢٠١١