الثلاثاء، 29 نوفمبر 2011

عن #SherioRecommends

بدات الفكرة بشكل عفوي يومين قبل الانتخابات، يوم 26 نوفمبر و كنت قد استقريت على مرشح العمال في دائرتي لتوه بعد حديث مع الحاج حسن سينيوريتا احد الرجال القدامى بشارع المنيل، و كنت لا زلت اختار ما بين الكتلة المصرية و قائمة الثورة مستمرة...في نفس الوقت كان على تويتر ناس كتير مش عارفة هتختار مين بالذات مقعد العمال، احد مخلفات العهد الناصري، فكرت اني لو كنت في مصر الجديدة كنت هنتخب عمرو حمزاوي و لو مدينة نصر كنت هنتخب النجار و كتبت كده و كتبت معاها #SherioRecommends بالمرة كدة....بصيت لاقيت سيل من الاسئلة عن العمال و الدوائر المختلفة فاكتشفت ان فاضل يوم و نص على الانتخابات و ناس كتير معندهاش فكرة هتنتخب مين فقررت اعمل قائمة باللي اقدر علية و ادور انا ممكن تفيد حد...و كانت 


لينك لتوصيات محافظة القاهرة 

انا اخترت ازاي.


البداية: انا عرفت انا اتجاهي السياسي ايه، انا طول عمري عارف ان انا وسطي (مش الحزب) فانا فيا حتة ليبرالية على نشأة محافظة و مقتنع بالرأس مالية و العدالة الاجتماعية من غيرها المجتمع لا يصلح. ربما المجتمع حاليا بيتشد لليمين الديني فمكاني مع انه وسطي في المطلق الا انه بيبدو ليبرالي نسبيا جنب الوضع الحالي في مصر.
جدير بالذكر اني ليا مقولة بكررها هي "لولا الاسلاميين لكنت اسلامي" لكن ده موضوع تاني لوقت تاني.


ثانيا: فكرت انا عايز المجلس عامل ازاي، قلت ده مجلس لازم يعكس المجتمع زي ما هو قبل الحملات الانتخابية و الاستقطاب و الاقصاء، مصر على سجيتها...يعني لازم تكون وسطية في المطلق فيها نسبة ليبراليه و بُعد يساري و اخوان و بعض السلفيين كمان. 


ثالثا: شفت الواقع بعد الثورة و الحركات السياسية و الاستقطاب و الاقصاء عامل ازاي، و لقيت التيارات الاسلامية ليها الغلبة، و انا اختلف معاها ايديولوجيا و مع المتطرف منها اعتبره خصم سياسي.


و انا اريد مصر مدنية ديمقراطية تعددية عظيمة الشأن داخليا و خارجيا.


بعد التلات نقط اللي ذكرتها ابتديت مرحلة التدوير و كنت بعتمد على التيارات القوية و الاسماء المعروفة و خصوصا في الفردي عشان الصوت للي ملوش فرصة في المكسب هو صوت مهدور. 


ذاكرت الدوائر و قسمتهم و ابتديت بالقوائم، مبسطش للقوائم الدينية لاسباب مذكورة سابقا و ركزت مع القوائم المدنية...كان قدامي الثورة مستمرة و هي زي اسمها كده بتحافظ على مكتسبات الثورة و لديها برنامج محترم و ينقصها الخبرة السياسية في التطبيق. الكتلة المصرية و هي التيار الاكثر ليبرالية و براجمتية في كل القوائم و مُطعم بنكهه يسارية و لكنه يحمل بعض الفلول. حزب العدل بمكتبة السياسي الجيد المُطعم ببعض رموز(مستخدمها كده يعني) الثورة. حزب الوسط و هو الحزب المحافظ بالمعنى السياسي للكلمة ذو الشخصيات المحترمة في قياداته.


الفصل في القوائم بالنسبه لي كان بيبقى بقوة القائمة، التيار اللي انا مقتنع بيه ابص لقائمته و اشوف اول 2-3 فيه و الشخوص الافضل اروح لقائمتهم. و انتهى بي الحال باتنين ثورة مستمرة (لاقتناعي بيها) و اتنين كتلة مصرية لقوة قوائمهم.


الفردي كان سهل في الفئات في بعض الدوائر. سياسيين معروفين ذوي سمعة كويسة مصر محتاجاهم في البرلمان زي النجار و حمزاوي، و اخرين سؤال اصحابي من النشطاء السياسيين او المنتمين لاحزاب و سيرهم على النت رجحت كفتهم زي حافظ ابو سعدة و ماجي محروس و جون ابادير. اللي فضل في القوائم حسم عن طريق مقارنة ترشيحات التيارات الختلفة باراء اصدقائي من النشطاء.


في العمال كنت بسأل مرشحي الفئات يرشحوا حد و غير كده السؤال في الشارع كان بينفع، النت لغاية دلوقت كان برضه ابن حلال.


انا معترف اني رضيت ببعض الفلول لكن بعد التأكد من انهم مكنوش من المزورين (بشكل شخصي) و ده في مقاعد العمال، ده لأن الوطني كان بيضم اي حد عنده شعبية و كان ارتضاء الانضمام عادة ليسهيل الحصول على خدمات لاهل المنطقة، زي الصعيد مثلا.


نقاط اخيرة:

  • اعترف ان في المرحلة الاولى حزب الوسط سقط مني في حساباتي سهوا.
  • لو كان العدل و الوسط اتحدوا كانوا عملوا احسن القوائم.
  • هحاول في المرحلة التانية ابقى احط اسباب الاختيار و اطرح بدائل و اتجنب الفلول.
  • اي تيار اسلامي بيقول حاجة غير انة يسعى للسلطة هو تيار منافق و اقروا تاريخ الدولة الاسلامية اللي كان كله فرق و مذاهب تتناحر على السلطة و بتكفر بعضها البعض باسم الدين.
  • ولا الليبرالية ولا العلمانية حرام، دي مذاهب سياسية ملهاش دعوة بالقياس الايماني. ممكن صاحبها يبقى متدين او كافر و ده ملوش دعوة بيها كمذهب.

و ارجو ان المرحلة التانية اعرف اعمل توصيات على التسع محافظات.

الأحد، 20 نوفمبر 2011

ثرثرة ذاتية في يوم عاصف

السطور التالية نقشتها و انا في طريقي الى المنزل من العمل، كنت قد اخذت المترو الذي يوصلني الى الضفة المقابله لبيتي من النهر و اتت الفكره و انا اعبر كبري الملك الصالح خالد الذكر، و كانت خيم الاعاشة تحترق في الميدان الهواء يهب من مكاني الي هناك.




جو رائع بنسيم عليل
سما صافية و نيل بيجري بخفة و دلع
كلب محني ماشي ذليل

جو رائع بنسيم عليل
بيهب من عندنا لمهد التحرير
الورد اتقلع و الجناين اتحرقت
و النسيم بيهب من عندنا للمهد
معرفش فينا غير كلب...ماشي محني و ذليل

سما صافية و نيل بيجري بخفة و دلع
و الصبي قاعد بيغازل في الصبايا...حقه
هو مين يشوف الخفة و ميتغزلش في الدلع

الناس تعدي و تسير
و الكلب محني حزين
مهو هو الوحيد اللي حس و سمع
شم حريق الحرية انكسر
ولما انكشفت غمامته وعرف الحقيقة ارتاح مرة
و اتقتل من جواه الف مرة و مرة
حقيقة ان كل الناس مش ناس
انسدل عليهم الذل لباس
كلهم كما الكلاب...كما هو...ماشيين محنيين و ذلولين

بس لو تنكشف الغمامة دية
و يشموا حريق مهد تحرير الحرية
يقوموا يهبوا كما الاسود في غابة قوية
ينتزعوا حرمة مهد الحرية
ويرتاحوا كبني ادمين شامخه و ابية

الثلاثاء، 1 نوفمبر 2011

الديمقراطية مش بس حرام......دي كُفر كمان



مش عارف لية بقيت دائم الانتقاد للاسلاميين/المتأسلمين مع اني اؤمن بان لو الواحد ركز مع حد او جهة و قعد ينتقد في العيوب هينسى نفسة و سُبُل تقدمه، و لكن في حالة الاسلاميين الموضوع مختلف لان ديني الجميل السَمِح بلاقية بيتشوة على طول على ايد ناس (في رأيي) قاعدين في الضلمة....دة البعض مش الكل طبعا بطلوا تربُص.


عبد المنعم الشحات و هو المُتحدث الاعلامي باسم الحركة السلفية و اللي كان معروض علية انة يمسك المكتب السياسي لحزب النور خرج علينا من شهر تقريباً (معلش الفيديو لسة واصلي من شوية) بيقول ان اليمقراطية مش بس حرام...لا دي كمان كُفر...هو هيتصرف و يلعب ديمقراطية من غير ما يكفر متقلقوش علية. و طبعا هو رجل صاحب علم و له مريديه و جمهوره ولو عايز يكفَر يكفُر براحته (من قال لأخيه يا كافر فقد باء بها أحدهما) و الي ساعتها برده هيبقى براحته يعني (فَمَنْ شاءَ فَلْـيُؤْمِنْ وَمَنْ شاءَ فَلْـيَكْفُرْ).


لما شفت الفيديو فكرت بسرعة كدة و لقيت الكلام مش راكب (كتير هيقولولي متفكرش في الدين، لو سمحت اقرأوا التدونة دي بسرعة كدة) فقررت ارد بالافكار اللي عدت عليا.


انا من الاصل مش شايف اختلاط بين الدين و السياسة عامة و الديمقراطية خاصة اكتر من الاطار العام الاخلاقي و العقائدي اللي بنتحرك بداخلة لكن مش مهم، المهم انك لما تقرأ في التاريخ شوية هتلاقي ان العرب و المسلمين في اوائل دولتهم (الخلفاء لغاية العصر العباسي الاول كدة) كان عندهم قدر كبير من حرية التعبير اللي هي اساس الديمقراطية، و ده بالمقارنة بالامم المجاورة ليهم زي الفرس مثلا؛ يعني الخليفة مكنش اعلى من الناس كتير و كان دائما ما يتناقش مع جالسية بحرية. حتى ايام الرسول تلاقي ان كان في حتى مغالاة في الديمقراطية و التعبير عن الرأي كان بحرية شديدة لدرجة نزول آية بتحد من الديمقراطية دي (لا تَرْفَعُوا أَصْوَاتَكُمْ فَوْقَ صَوْتِ النَّبِيِّ)اللي منها نستدل انه كان في حوار منفتح مع خير البرية الرسول (ص).
بلاش دي...حد عارف اسباب نزول آية (يَا أَيُّهَا الَّذِينَ آمَنُوا لا تَدْخُلُوا بُيُوتَ النَّبِيِّ إِلاَّ أَن يُؤْذَنَ لَكُمْ)؟
اقلكم انا. كان في واحد سيد قومة اسمه عُيَينة بن حصن دخل على النبى (ص) و عنده عائشة بدون استئذان، فقال رسول الله: أين الااستئذان؟ قال يا رسول الله ما استأذنت على رجل قط ممن مضى منذ ادركت، ثم قال: من تلك الجميلة الى جانبك؟ فقال (ص) : هذه عائشة أم المؤمنين. فلما خرج سألت عائشة: من هذا يا رسول الله؟ قال احمق مطاع، و إنه على ما ترين لسيد قومه. و نزلت الآية و زي ما هو واضح ان سقف الحرية الكلامية كان عال بعيداعن قلة الذوق.
طب حد يعرف سبب نزول آية ( إِنَّ الَّذِينَ يُنَادُونَكَ مِنْ وَرَاءِ الْحُجُرَاتِ أَكْثَرُهُمْ لا يَعْقِلُونَ)؟ مش هقلكوا، دوروا عليها انتو بقة (آه انا غلس و عايزكو تتعبوا و تدوروا، مش انتو على النت اصلا؟ اتعبوا عشان المعلومة).


انا عارف الامثلة دي مش بتعبر عن الديمقراطية بلآليات الحالية بس النقاش الحر واضح في المعاني و دي اساس الديمقراطية الحديثة.


على فكرة بعيدا عن موضوعنا يا ريت حد من بتوع دراسة السياسة يخرجلنا نظام احدث شوية من الديمقراطية عشان قدم و مشاكله كترت.


بمناسبة الحديث في الدين انا منتظر اللي هيكفروني و اللي هيتهموني بالهرطقة (ايوة الهرطقة انا مثقف جدا اصلا).