السبت، 28 أبريل 2012

آدي اللي خدناه من الديمقراطية

"هو انت ناوي تختار مين؟" 

بقى سؤال مرعب بيتسأل بمعدل ستاشر مرة في اليوم و لازم الهروب منه، لو معرفتش تهرب يبقى احسنلك تتوقع اللي قدامك ميوله ايه تقوم تيجي معاك صح و تتفادى جدل سياسي عقيم؛ فالموجودين على الساحة كلهم كَسر و المفروض نختار احسن الوحشين و دي وجهة نظر او هم بني ادمين عاديين كويسين و انا ظالمهم بس اتباعهم مألهينهم على فشوش و دي وجهة نظر تانيه...في الحالتين واحد.
ربنا نجدنا من المسيح الدجال، ستر و عدل من عنده، و المصيبه انه كان جاهل و هيغرقنا و هيضحك الناس علينا. اتوزع قطيعه ما بين متمسك بيه على طريقة جولييت اللي انتحرت ورا روميو (او العكس مبقتش فارقه). او راحت على الاحتياطي صاحب صاحب مشروع النهضة لأنه مشروع عظيم و رائع و هينهض بمصر بالرغم انه فنكوش و اتباع و هو لسه ملوش وجود بس مفيش مشكله نؤمن بيه برضه و نسبح بعظمته. او ورا الليبرالي اللي هو اخواني بس مش اخوان لكن هيطبق الشريعة و هلٌم جرَا. الحصان الاسود لحد دلوقت راجل مغيرش في طريقة تفكيره من اربعين سنه. بس بقى او عندك طقم الفلول اللي هينقذونا من الاغلبيه الباغية، فيهم واحد قتل و اتقتل و عاد من القتل اكمنه زومبي حتى عشان كده يوم مستبعدوه رجع تاني بقدراته الزومبية الفذة (على فكره رجوعه صحيح من وجهة نظري) او ممكن تختار الفلول التاني اللي انا مش مقتنع قوي انه فلول بس المشكلة انه فاشل معملش حاجة تملى عيني غير انه لما بيتكلم محدش بيفهم منه هو عايز ايه بس بيبسط قوي و بيجيب فلوس من قطر بالتليفون و كده.


من فترة كنت فكرت اني لو اخترت رئيس في التو و اللحظة هختار ابو الفتوح، راجل كلامه زي الفُل و كونه بيقول انه اخوان زي ما هو معناها انه راجل عنده اصل بعدين الاخوان مش سُبّه، مشكلتهم في التنظيم و السمع و الطاعه و الشاطر و استبنه و احب على ايدك يا مُرشد، بس الشهادة لله ابو الفتوح مش اخوان تنظيميا؛ لكن مشكلته معايا بقى ان البرلمان يميني متطرف فمش هنجيب حد يميني وسط مش وقت الزوايا تخرب و عجلة الانتاج معادتش مستحمله. 
قوم قولت يبقى مفيش غير صباحي، و بصراحة الراجل تقيل، يعني لو قارنا بين حديثه مع السادات و حديث ابو القتوح، صباحي يكسب طبعا، اكثر موضوعيه و اكثر ادبا و مأثارش مواضيع شخصيه ولا بلالين فرقعها من اجل الجعجعه (صحيح ان ابو الفتوح تطور كتير من وقتها لدلوقت و صباحي ثابت مكانه بس قشطه) و بعدين كمان صباحي مناضل من زمان و واضح و شفاف و مبيتلونش بس تفضل مشكلة انه راجل شمال صرف في زمن الايديولوجيات البحته فيه مبتأكلش عيش فبرضه مقتنعتش.
فكرت انا عايز مصر وسطية و البرلمان متطرف بس افتكرت ان التطرف ميتغلبش بتقوية التطرف المعاكس ليه بل بدعم الوسطيه فقلت اتوكل على الله مع ابو الفتوح لقيت النور بيدعمه فهم اكيد مش هبل هيجيبوا واحد مينفعهمش ولا بيصوتوله عند في الاخوان اللي ملهومش عهد؟
طب شفيق طاه؟ راجل عنده فكره كويسه عن توازنات القوى جوه و بره و بيعرف يشتغل بس مش هياكل بدماغ المواطنين حلاوة اكمنه زيرو كاريزما. ولا موسى اللي عنده نفس الفكرة عن التوازنات و فرعون و برنس بس فاشل في تحقيق الاهداف؟

اهرب من زحمة افكاري و اقول لصاحب السؤال اني لسه مقررتش...يقوم باصصلي بعدم اقتناع و نغير الموضوع.